ملکی معیشت بہتری آلے پاسے ٹردی پئی اے ، حکومت توانائی دے شعبے دی ترقی تے کم کریندی پئی اے ،احسن اقبال
APP13-290924
LAHORE: September 29 - The Federal Minister for Planning, Development & Special Initiatives, Ahsan Iqbal Addressing to Asia’s Energy Transition Summit at LUMS University. APP/AMI/FHA
لاہور۔29ستمبر(اے پی پی) وفاقی وزیر منصوبہ بندی ،ترقی و خصوصی اقدامات پروفیسر احسن اقبال آکھیے ملکی معیشت بہتری آلے پاسے ٹردی پئی اے ، حکومت توانائی دے شعبے دی ترقی تے خلوص نیت نال کم کریندی پئی اے ، پاکستان کوں ماضی اچ وݙی لوڈشیڈنگ دا سامݨا ہئی، ساݙی حکومت سی پیک دے تحت توانائی دے منصوبے شروع کیتے تے ساݙا ٹارگٹ گرین انرجی دا حصول اے،اساں چاہندوں جو ساریں کوں سستی بجلی تے ماحول دوست توانائی ملے ۔ اے ڳالھ انھاں لاہور یونیورسٹی آف مینجمنٹ سائنسز(لمز) اچ ایشیا انرجی ٹرانزیشن سمٹ2024 دے ݙوجھے ݙینھ بطور مہمان خصوصی خطاب کریندے آکھی اے ۔ ایں موقع تے صنعتکار و تاجر رزاق داؤد، نفیسہ شاہ،پروگرام ڈائریکٹر مصطفےٰ امجد، شاہ جہاں مرزا،ڈاکٹر شکیل ساجد سودھے ٻئے ملکی و غیر ملکی ماہرین دی وݙی تعداد موجود ہئی ۔ کانفرنس توں خطاب اچ پروفیسر احسن اقبال آکھیے موسمیاتی تبدیلی ھک ٻہوں وݙا مسئلہ اے ۔ موسمیاتی تبدیلی پاروں اساکوں ٻہوں ضیان تھئے ،ݙو سال پہلے اساکوں موسمیاتی تبدیلی پاروں ٻہوں اوکھ تھئی جیں توں پاکستان کوں 30ارب ڈالر دا ضیان چاوݨا پئے ، ایشیا دنیا دی آبادی دا نصف حصہ اے ، توانائی استعمال کرݨ تے دنیا دی معیشت اچ ایشیائی معیشت دا وݙا حصہ اے ۔وفاقی وزیر توانائی دے حوالے نال پنج اہم نکتیں تے روشنی پیندے آکھیے ایشیاء ٹیکنالوجی دا لیڈر اے،ایشیا ٻہوں وختی دنیا دا ادھے توں ودھ جی ڈی پی گھن گھنسی ۔ اساکوں آپݨے منصوبیں اچ جدت گھن آوݨی ہوسی ، ایشیائی ملکاں کوں از خود پیش آندے چیلنجز نال رل تے نبݨݨا ہوسی کیوں جو ترقی یافتہ ملک آپݨی غلطیاں ٹھیک کرݨ سانڳے تیار کائنی اساکوں خود ہی آپݨے مسئلیں دا حل کڈھݨا ہوسی ،کوئی ملک امیر اے تاں کوئی غریب ، ایشیا کوں چنڳاں کرݨ سانڳےساریں ملکاں دا رلے ٹرݨ ضروری اے ،موجودہ حالات پاروں ایں خطے دی بہتری سانڳے ساریں دی سانجھ ضروری اے ، پاکستان موسمیاتی تبدیلی توں ساریں توں ودھ متاثر تھیندا پئے 2022ء اچ موسمیاتی تبدیلی پاروں پاکستان کوں 30ارب ڈالر دا وݙا ضیان برداشت کرݨا پئے ، چھل توں متاثر تھیوݨ آلے علاقیں اچ جانی تے مالی ضیان تھئے ، وبائی مرض کھنڈݨ پاروں اوکھ ودھ ڳئی ،حالات تے قابو پاوݨ اچ حکومت اتے عوام رل تے کم کیتا جیں پاروں چھل دے بعد حالات معمول تے آئے ۔ جݙاں سی پیک تے کم شروع تھیا تاں اساں توانائی تے ڳالھ مہاڑ کیتی کیوں جو پاکستان کوں 20،20 گھنٹے لوڈ شیڈنگ دا سامݨا ہئی،حکومت ہائیڈل پاورپراجیکٹس شروع کیتے،سولر منصوبیں تے وی کم شروع کرݙتا ڳیا ،پاکستان اچ توانائی دے ماحول دوست منصوبے لاتے ڳئے کولیں دے استعمال توں بجلی بݨاوݨ سانڳے وی ماحول دوست پالیسی تے کم کیتا ڳیا ، توانائی دے شعبے اچ اصلاحات دا عمل جاری اے۔وزیر منصوبہ بندی آکھیے توانائی دی لوڑھ پوری کرݨ سانڳے تاجکستان نال کاسامنصوبے تے کم کریندے پیوں ، پاکستان اچ موسمیاتی تبدیلی سانڳے ٻہوں اقدامات چاتے ویندے پئن اساکوں ݙیکھݨا ہوسی جو انھاں منصوبیں سانڳے سرمایہ کاری کیویں ملسی ،اساکوں ایجھا ماحول بݨاوݨا ہوسی جیں اچ سرمایہ کاری سوکھی ہووے تے توانائی دے شعبے اچ مزید ترقی تھیوے ایں سلسلے اچ آپݨیاں پالیسیاں بہتر کرݨ دی لوڑھ اے ۔ ساݙا ٹارگٹ گرین انرجی گھنݨ اے چاہندوں جو ساریں کوں سستی تے ماحول دوست توانائی ملے ، جنھاں ملکاں ماحول خراب کیتے او آپݨی ذمہ واری پوری کرݨ سانڳے تیار کائنی جیں پاروں ترقی پذیر ملک شدید متاثر تھیندے پئن،امید اے ایشیائی ملک گرین انوائرمنٹ سانڳے رل تے کم کریسن ،ایشیائی ملکان کوں ھک ݙوجھے نال تعاون نال آپݨے مسئلیں دا ھل کڈھݨا ہوسی، چھیکڑ اچ مہمان خصوصی پروفیسر احسن اقبال کوں شیلڈ پیش کیتی ڳئی۔
.jpg)
