لاہور۔31اگست(اے پی پی) وفاقی وزیر منصوبہ بندی و ترقی پروفیسر احسن اقبال آکھیے تلویں سطح تے اختیارات دی منتقلی مسلم لیگ (ن) دے منشور دا حصہ اے، ،پنجاب حکومت دے 14روپے فی یونٹ بجلی ٻلاں دے ریلیف تے عملدر آمد شروع تھی ڳئے، نو مئی تاریخ دا کالا ݙینھ اے ،بانی پی ٹی آئی کوں این آر او نہ ملسی ۔ اے ڳالھ انہاں ماڈل ٹائون اچ پارٹی دے مشاورتی اجلاس دے بعد میڈیا نال الویندیں آکھی اے ۔ پروفیسر احسن اقبال آکھیے مسلم لیگ (ن) دے مشاورتی اجلاس اچ پنجاب دے عوام کوں بجلی ٻلاں اچ ریلیف ݙیوݨ تے پارٹی کوں منظم کرݨ متعلق تجویزاں دا جائزہ ڳھدا ڳئے ۔اجلاس اچ وزیر اعظم محمد شہباز شریف اتے وفاقی وزیر توانائی عوام کوں ریلیف ݙیوݨ سانڳے توانائی دے شعبے اچ اصلاحات اتے وزیر بلدیات پنجاب صوبے اچ بلدیاتی انتخابات متعلق پارٹی قیادت کوں بریفنگ ݙتی۔ ایں موقع تے پارٹی صدر محمد نواز شریف عوام کوں مہانگ توں نجات ݙیوݨ تے ٻئے شعبیں اچ ریلیف ݙیوݨ سانڳے حکومتی خرچے گھٹاوݨ تے بلدیاتی نظام دے قانون اچ اصلاحات دی ہدایت کیتی ۔پارٹی صدر آکھیے عوام کوں اوکھ توں کڈھݨ ریاست دی ذمہ واری اے ، جیویں طرح مسلم لیگ (ن) 2013 اچ عوام کوں لوڈشیڈنگ دے عذاب توں نجات ݙیوائی ہئی ایں جذبے نال ہݨ ورثے اچ ملݨ آلے توانائی بحران کوں وی حل کرتے عوام کوں ریلیف ݙیسوں ۔محمد نواز شریف آکھیے پاکستان اچ بلدیاتی نظام جمہوریت دا ھک بنیادی ستون اے لہذا ایں نظام اچ ایجھا قانون تے اصلاحات کیتیاں ونڄن جو تاں جو عوام دے بنیادی مسئلے انھاں دے دروازے تے چنڳے طریقے نال حل تھی سڳن ، کیوں جو موثر بلدیاتی نظام مسلم لیگ ن دے منشور اچ شامل اے ۔وفاقی وزیر احسن اقبال آکھیے 2013 مسلم لیگ (ن) دے دور حکومت اچ پاکستان برق رفتاری نال ترقی کریندا پیا ہئی ،معیشت مستحکم ہئی ،روپیہ تکڑا ہئی ، ڈالر کنٹرول وچ ہئی ،دہشت گردی منڈھوں مک ڳئی ہئی ، لوڈشیڈنگ دے عذاب توں عوام کوں نجات مل ڳئی ہئی ، ول اچانک ھک اناڑی اتے نا تجربہ کار بندہ ملک تے مسلط کرݙتا ڳیا جیں ہسدے وسدے پاکستان کوں اڄاڑ تے رکھ ݙتا ، اڄ اوہے لوک چیکاں مریندے پئن جو ایجھے حالات بݨاوݨ دے ذمہ وار ہن ۔احسن اقبال آکھیے اڄ اے آکھدے پئن بانی پی ٹی آئی کوں سہولتاں نی ݙتیاں ویندیاں پیاں ، بانی پی ٹی آ ئی کوں جیل اچ فائیو سٹار ہوٹل جیہاں مراعات ملدیاں پئن ، جیل اچ انھاں کوں او سہولتاں ملدیاں پئن جیڑھیاں ماضی اچ اساکوں نہ ملدیاں ہن،بانی پی ٹی آئی کوں جیل اچ سہولتاں ݙیوݨ ساݙا وݙا دل اے ، میݙی گرفتاری توں 3 ݙینھ پہلے میݙی سرجری تھئی ہئی میکوں ڈاکٹراں دی ہدایت دے باوجود فزیو تھراپسٹ نہ ݙتا ڳیا ،اساکوں تاں آپݨے وکیلاں نال ملݨ دی اجازت وی کائناں ہئی ،بانی پی ٹی آئی کوں ایں سیل اچ رکھیا ڳئے جتھاں میکوں رکھیا ڳیا ہئی جے او سیل غلط اے تاں بانی پی ٹی آئی کوں پہلے میں توں معافی منگݨی چاہیدی اے ۔ وفاقی وزیر آکھیے اساں بانی پی ٹی آئی توں کوئی بدلہ نی ڳھدا انھاں دیاں چیکاں نکلدیاں پئن ، اے این آر او چاہندن ،انہاں کوں این آر او نہ ملسی ،انہاں کوں رسیداں ݙکھاوݨیاں پوسن اے اساں کنوں وی رسیداں منڳدے ہن ، انھاں آکھیے 190ملین پاؤنڈ توں ٻہوں یونیورسٹیاں اتے ہسپتال بݨ سڳدے ہن مگر انھاں کجھ ہیریں سانڳے اتنا پیسہ ونڄا ݙتا ، انھاں کوں خود کوں بے گناہ ثابت کرݨا ہوسی نتاں آپݨے جرم دا حساب ݙیوݨا ہوسی ۔احسن اقبال آکھیےپنجاب حکومت 14روپے فی یونٹ ریلیف ݙتے ایندے نال اساں پاور سیکٹراچ 4 ݙھاکیں دے نقصد ہٹاوݨ تے کم کریندے پیوں ،2013 اچ 18، 18گھنٹے دی لوڈ شیڈنگ ختم کیتی تاں اڳوں ھک ݙو سال اچ بجلی دیاں قیمتاں گھٹیسوں ۔ ھک سوال دے جواب اچ انھاں آکھیے ملک اچ بلدیاتی انتخابات دی منظوری سانڳے قومی اسمبلی اچ قرار داد وختی پیش کیتی ویسی جیویں اسمبلی توں منظوری تھیسی پورے ملک اچ بلدیاتی انتخابات کرائے ویسن ، انھاں آکھیے پی ٹی آئی دا سوشل میڈیا سیل پوری دنیا اچ پاکستان کوں بدنام کریندا پئے ،امریکی کانگریس اچ قرارداد بھارتی لابی نال رل تے منظور کروائی ڳئی ، ایجھے لوکاں نال مذاکرات کیویں تھی سڳدن ،بانی پی ٹی آئی دے طرز سیاست نال 9مئی دے واقعات تے معافی تئیں مذاکرات نی تھی سڳدے ،پی ٹی آئی کوں ملک دشمن سیاست تے قوم توں معافی منڳݨی ہوسی ول انھاں نال ڳالھ تھی سڳسی
.jpg)
