پورے ملک دے پریس کلباں کوں جدید تقاضیں توں ہم آہنگ کرݨ کیتے وزارت اطلاعات اپݨا کلیدی کردار ادا کریندی رہسی ، وفاقی وزیر اطلاعات مریم اورنگزیب دی ایبٹ آباد پریس کلب دے وفد نال ڳالھ مہاڑ

اسلام آباد۔7جولائی (اے پی پی):وفاقی وزیر اطلاعات و نشریات مریم اورنگزیب آکھیے پورے ملک دے پریس کلباں کوں جدید تقاضیں توں ہم آہنگ کرݨ کیتے وزارت اطلاعات اپݨا کلیدی کردار ادا کریندی رہسی، اے ڳالھ انہاں ایبٹ آباد پریس کلب دے صدر راجہ ہارون اتے سیکرٹری جنرل راجہ منیر دی قیادت اچ صحافیاں دے وفد نال ملاقات اچ ڳالھ مہاڑ کریندے ہوئیں آکھی اے ۔ ایں موقع تے وفاقی وزیر پارلیمانی امور مرتضیٰ جاوید عباسی وی موجود ہن۔ وفد وفاقی وزیر اطلاعات کوں پیش آندی مشکلات بارے آگاہ کیتا۔ ایں موقع تے ڳالھ مہاڑ کریندے ہوئیں وفاقی وزیر اطلاعات آکھیے حکومت آزادی صحافت تے کامل یقین رکھیندی اے ۔ انہاں آکھیے ایبٹ آباد پریس کلب دا شمار ملک دے اہم اتے ذمہ وار پریس کلبز اچ تھیندے ۔ وفاقی وزیر اطلاعات ایبٹ آباد پریس کلب اچ فوری طور تے کمپیوٹر لیب اتے سٹوڈیو دے قیام دی ہدایت ݙتی۔ انہاں آکھیے ایبٹ آباد پریس کلب کوں اعلان کیتی ڳئی گرانٹ وی ݙتی ویسی ۔ انہاں آکھیے صحافیاں دے مسئلیں کوں حل کرݨ ساݙی اولین ترجیح اے۔ ایں موقع تے وفاقی وزیر پارلیمانی امور مرتضیٰ جاوید عباسی ایبٹ آباد پریس کلب کیتے کمپیوٹر لیب، سٹوڈیو دے قیام اتے گرانٹ دی فراہمی دے اعلان تے وفاقی وزیر اطلاعات دا شکریہ ادا کریندے ہوئیں آکھیے ایبٹ آباد دی صحافتی برادری محدود وسائل دے باوجود اپݨی پیشہ ورانہ خدمات انجام ݙیندی پئی اے ۔ صحافیاں دے وفد وفاقی وزیر اطلاعات مریم اورنگزیب اتے وفاقی وزیر پارلیمانی امور مرتضیٰ جاوید عباسی دا شکریہ ادا کیتا۔

مضمون کا ماخذ : ماہی گیری کا جنون

متعلقہ مضامین